Капитенот на македонската ракометна репрезентација Никола Митревски имаше 10 интервенции против Франција во поразот од 39-29 во 1.коло на Европското првенство во Германија.
Бевме рамноправни 20 минути против големиот фаворит, но потоа направивме многу грешки кои скапо ги плативме. Тешко е да се следат „триколорите“, кои располагаат со неверојатен број на квалитетни играчи.
„Почнавме навистина добро, добро се браневме и постигнувавме голови според нашиот план што го имавме поставено“, рече по натпреварот Митревски. „За жал испуштивме шанса да поведеме со три разлика и направивме серија грешки во продолжението. А кога правиш грешки против така силен тим, тогаш ја плаќаш цената. Ние рековме и претходно, Франција е еден од најдобрите тимови во светот. Бевме рамноправни 20 минути и тоа е нешто на што можеме да градиме во иднина. Тие имаат толку многу опции на клупата, многу искуство, а тоа е тешко да се следи сите 60 минути“, истакна нашиот голман.
Македонија и Франција денеска играа пред рекордна публика од 53.000 гледачи на фудбалскиот стадион во Диселдорф. За Митревски тоа е нешто што ќе го памети до крајот на кариерата.
„Беше навистина чест и се обидував да уживам. Ова е нешто комплетно различно од она што сме навикнати, бидејќи трибините се доста далеку од теренот. Но ова е нешто што ќе го паметам до крајот на мојата кариера“, заврши македонскиот чувар на мрежата.