Началниците на генералштабовите на земјите-членки на НАТО денеска се состануваат во Рига, Летонија, каде главна тема на разговор е серијата нарушувања на воздушниот простор од страна на Русија. Претседателот на Воениот комитет на НАТО, адмирал Џузепе Каво Драгоне, изјави дека ваквите акции се „непромислена ескалација“ и ја загрозуваат безбедноста на сите сојузници.
„Целосна солидарност со сите земји-членки чии воздушни простори беа нарушени. Одговорот на Алијансата ќе биде се посилен“, порача Драгоне, повлекувајќи историска паралела со советските прекршувања на воздушниот простор во 1939 година.
Претседателот на Летонија, Едгарс Ринкевичс, побара итно зајакнување на воздушната одбрана и трансформација на мисијата за надгледување во целосна воздушна одбранбена мисија во Балтикот.
НАТО веќе забележа повеќе прекршувања на воздушниот простор над Полска и Балтичките земји, а состанокот во Рига е дел од напорите за спроведување на одлуките од самитот во Хаг.