Македонското министерство за надворешни работи, како дел од претседавачката тројка на ОБСЕ испратило нон-пејпр до земјите членки на ЕУ и на ОБСЕ, со која се иницира заедничка сеопфатна стратегија како да се надмине комуникацискиот јаз меѓу западните земји и руското општество, во услови на зајакнати западни санкции кон Русија и силна анти- западна пропаганда на Кремљ.
„Најголемата цена на војната паѓа на плеќите на обичниот народ. На крајот лидерите можеби и ќе си податат рака, но цената ќе ја платат граѓаните. Затоа треба да се најде начин да се уверат граѓаните на Русија дека остатокот од Европа и другите не се нивни непријатели. И да се увери рускиот народ дека целта е да се врати мирот и да продолжи взаемната соработка заснована на еднаквост, слобода, правда, почитување на човековите права и пријателски односи меѓу државите“ – пишува во нонпејпрот.
Иницијативата, како што се дознава, шефот на македонската дипломатија Бујар Османи ја презентирал и на последниот последниот вонреден министерски состанок на НАТО и наишла на позитивни оцени. Но засега останува нејасно како сето тоа би се реализирало, во услови и на се позаострена информативна војна.