Приватните матичните лекари повторно на протест – утре нема да издаваат рецепти, ниту ќе го користат системот Мој Термин, соопштија од Здржението на приватни матични лекари. Во преговорите со Министерството за здравство ниту едно барање на лекарите, специјалистите, лаборантите не било прифатено, а ниту од ФЗОМ, се вели во нивното соопштение. Затоа, утре ќе примаат само итни случаи.
Претходниот протест траеше само неколку часа, откако лекарите добија ветувања дека во наредните недели ќе се дојде до договор. Имено, требаше да се формираат работни групи најдоцна за две недели и проблемите на матичните лекари еден по еден да се најдат на маса во потрага по решение.
Од Министерството за здравство ветија дека ќе помогнат за минимална плата на вработените во ординациите, а административните грешки на ПЗУ-ата нема да поминат со парична казна туку со опомена.
Матичните бараат измени во Законот за здравствена заштита, за пациентите да припаѓаат на матичната ординација, а не да бидат „врзани“ за факсимилот на лекарот. Едно од главните барања е и зголемена капитација. Претходно на матичните лекари им беше ветено, но не и остварено дека капитацијата ќе чини 95 денари по пациент.
