Опколени со седиштата на Финансиска полиција, Финансиско разузнавање, Антикорупциска комисија, на телекомуникациски оператор и на 50-тина метри од МНР, куќите во скопското централно Пајко маало букнуваат и горат една по една.
Ноќта петок кон сабота (12/13.02.2022.) изгоре уште една куќа стара повеќе децении и со културно-историска вредност. За горењето на семејната куќа, објавија правнуците на сопственикот кој што ја изградил.
Куќата била изгасната од противпожарна единица на град Скопје, а потоа на влезната дрвена капија е ставена и полициска лента за потребите на истрагата. Се наоѓа во делот познат и како адвокатска улица во Скопје.
Сопствениците се сомневаат дека е подметнат пожарот и дека не е првпат да гори куќа во овој дел на Скопје, опколен, но незаштитен од многубројните безбедносни институции во непосредно соседство. Сличен инцидент имаше и во септември лани, во куќа веднаш до оваа која изгоре за време на викендот.
Покрај тоа изгореа уште две бараки во Градски парк во близина на стадионот „Тоше Проевски“.
Од полицијата засега нема информации за причината за пожарот, а изгорената куќа не е пријавена ниту во неделниот ниту во понеделничкиот утрински билтен на МВР.
Денеска попладне МВР објави детали за пожарот: -Нa 13.02.2022 во 04.16 часот во СВР Скопје било пријавено дека на ул.„102“ настанал пожар во куќа сопственост на А.А.П.(58) од Скопје, која под наем ја користеле две фирми. Пожарот бил изгаснат од екипи на Бригадата за противпожарна заштита Скопје, а повредени лица нема. Увид извршила екипа на СВР Скопје.
Сомневањата на семејството се дека најверојатно станува збор за како што велат активности на градежната мафија, бидејќи изгорените куќи во Пајко маало се на атрактивна локација во центарот на главниот град, речиси на брегот на реката Вардар.
Досега нема никакви информации како завршија истрагите за пожарите во градски парк и во Пајко маало кои се случија минатата година.
Тогаш повеќе противпожарни возила интервенираа и ги изгаснаа пожарите, а во близина на поранешниот суд за прекршоци кој изгоре по напуштањето беше најдена и канта со бензин користена за подметнување на пожарот.
