Заврши победничката серија на МЗТ Скопје од пет натпревари во АБА2-лигата, откако денеска загуби минимално од Сутјеска со 56-55 во рамки на 8.коло на турнирот во Бања Лука. Нашиот шампион пропушти триумф во самиот финиш од натпреварот.
Во крајно неефикасен и неатрактивен натпревар, МЗТ Скопје го загуби дуелот во последните 30 секунди. „Металците“ имаа водство од 55-51, но направија серија грешки, промашија слободни фрлања, а тоа го искористи ривалот за да направи серија од 0-5 и да триумфира благодарение на Јован Војновиќ.
Нашиот состав не блескаше во ниту еден момент од натпреварот, но на крајот можеше да се радува, ако беше фокусиран во завршните моменти. Очигледно е дека момците на тренерот Дарко Радуловиќ не се на нивото од првиот дел од сезоната.
Немања Милошевиќ со 15 поени беше најефикасен кај МЗТ, додека 11 поени имаше Адем Мекиќ. Владимир Томашевиќ и Богдан Бојиќ со по 12 поени најмногу се истакнаа кај Сутјеска.
Нашиот состав останува на второто место на табелата 6 победи и два порази, додека Сутјеска е на пет победи и три порази. За два дена МЗТ ќе ги одмери силите со Подгорица.