Започнува изградбата на првата фаза на комплексот „Гранд“ во Скопје, предвиден за изградба на Градежната Парцела 1.1 во рамките на ДУП Ц08 за Ново Маало на територијата на Општина Центар, а во согласност со претходно добиеното Одобрение за Градење УП 1 Бр. 27-92 од 13 април 2021 година, соопштија денеска од МГ ФЕШН ДОО.
Од компанијата информираа дека во оваа прва фаза започнува изградбата на станбено-деловниот објект кој содржи: три нивоа под земја, приземје плус дваесет ката и поткровје.
– Објектот ќе биде изграден согласно највисоките архитектонски стандарди и нормативи за градење на енергетски ефикасни објекти кои имаат минимално влијание врз животната средина. Подземните нивоа се наменети за паркирање на возила, приземјето и првиот кат се со деловна намена, додека останатите катови се станбени единици со различна големина. Објектот е дизајниран да овозможи максимален комфор на идните корисници на станбените единици како и целосно искористување на природната светлина и визури, како кон реката Вардар, така и кон планината Водно, истакнаа од МГ ФЕШН ДОО.
Оттаму нагласија дека во рамките на ДУП Ц08 предвидена е и јавна површина од вкупно 7.500 метри квадратни или приближно површина колку Плоштад Македонија во центарот на Скопје.
– Нашата визија за овој јавен простор е да се уреди на современ начин, налик на урбаните паркови во светските метрополи, како на пример оној на „Porta Nuova“ во Милано, а за кое идејно решение ќе предложиме да биде распишан јавен конкурс во соработка со Општина Центар, додадоа од Компанијата.
Од МГ ФЕШН ДОО Скопје наведоа дека како општествено одговорна компанија, на свој трошок, ќе ги обештетат сите жители на Ново Маало кои имаат имот на тој простор, без разлика што на него не е предвидена никаква изградба на градежен објект, и тоа на ист начин и во ист сооднос како и на жителите на Ново Маало на чии имот е предвидена изградба на објекти.
Во однос на обесштетувањето, МГ ФЕШН ДОО Скопје, потсетува дека „со целосната реализација на овој проект, жителите на Ново Маало конечно ќе ги почувствуваат бенефитите на современото урбано живеење во главниот град преку урбано регенерирање на овој значаен простор во срцето на Скопје“.
– Станува збор за обесштетување на повеќе од 300 жители кои сè уште опстојуваат таму како староседелци во центарот на Скопје и кои повеќе од седум децении живеат во супстандардни услови, без фекална и атмосферска канализација, во објекти изградени кон крајот на 19-ти или почетокот на 20-ти век, а притоа со децении имале забрана за каква било реконструкција, доградба или изградба на нивните домови, посочија од компанијата.
Воедно, МГ ФЕШН ДОО Скопје ги повикува сите жители на Ново Маало кои имаат имот на територијата на ДУП Ц08, а со кои досега не се склучени договори за обесштетување, без разлика дали на нивниот имот е предвидена изградба на објекти или јавен простор, да ги контактираат или да појдат во нивните деловни простории со цел да склучат соодветни договори за обесштетување за изградба на целиот станбено-деловен комплекс предвиден со ДУП Ц08.
Предметот за Холидеј Ин отпочна со планот за зградите кој беше донесен во 2012 во времето на ВМРО-ДПМНЕ и беше спротивен на Генералниот урбанистички план.
Поради дупка во законот никој не е надлежен да спречи вакво неусогласеност на деталниот со Генралниот урбанистички план.
Власта на СДСМ не ја спречи изградбата на зградите иако пред да дојдат на владеачките позиции во општината, градот и на државно ниво го критикуваа планот и урбанистичките манири на ВМРО-ДПМНЕ дека се прави бетонизација на главниот град.
Дополнително општина Центар со мораториум се обиде да го спречи привремено ДУП-от, но тој мораториум беше укинат од Уставниот суд, а во меѓувреме деталниот план не беше сменет.
За време на мораториумот за градење, во 2018-та Министерството за транспорт и врски во мандат на министерот Горан Сугарески од СДСМ, државата го продаде државното земјиште на инвеститорот. Земјиштето со површина од 9.048 метри квадратни метри беше продадено по цена од 312 евра за квадрат.
Инвеститорот, заедничка фирма на МГ ФЕШН и МПЦ поседуваше поголем дел од просторот планиран за изградба со што беа турнати сите надежи за стопирање на голем бетонски блок во центарот на престолнината.