Финансиска полиција во општина Тетово за активности на екс-градоначалникот Беџети, актуелниот Касами смета дека е притисок

Финансиска полиција е во општина Тетово и врши истражни активности, известува од Тетово новинарката на Телма, Данијела Билбиловска.

Според првичните информации, истрагата е за активности во мандатот на поранешниот градоначалник Сади Беџети, кој повеќе од 8 години не е градоначалник. Беџети беше градоначалник по предлог на ДПА, а беше кандидат и на последните избори, но освои околу 10 проценти од гласовите.

Новиот градоначалник Билал Касами кој е и претседател на Беса ја оцени истрагата како притисок врз него.

Изјавил дека досега не вршеле никаква истрага, туку влегуваат во општината кога тој ја презеде функцијата.

Од финансиската полиција соопштија дека на прашањата за истрагата ќе одговорат во текот на денот.