За човечка жртва предизвикана со претекнување на полна лента на патот Кичево-Скопје на угорнината кон преминот Стража, затвореникот Зоран Милески-Кичеец ја призна вината и изрази каење. Поради тоа обвинителството во Гостивар предложи 6 месеци затвор за Кичеец, а гостиварскиот суд ја прифати таа казна.
Обвинителството во одговор посочува дека осомничениот во критичниот момент немал траги од алкохол или опијати во крв и урина и не ја пречекорил дозволената брзина на патот. Единствен констатиран пропуст со сообраќајното вештачење е претекнување на полна лента. Несреќата се случи на 4-ти септември во време кога Милески Кичеец имал условен отпуст од струшкиот затвор за да лежи и одмара дома.Наместо тоа, Кичеец возел двајца Срби кои по несреќата, тешко повредени си заминаа од Македонија. Жртва на несреќата е 32-годишен жител на Гостивар и татко на две деца. Кичеец издржуваше тригодишна затворска казна откако претходно призна вина и за случајот Рекет.
Кичеец во предлогот за спогодба барал и условна казна за тешката несреќа во која загина еден, а седумина беа повредени по негова вина.Обвинителството не прифатило и понудило минимална казна.
Бидејќи беше затвореник, но надвор од затвор, Кичеец се спаси и од притвор каде остана само неколку дена.
Притворот му беше определен затоа што гостиварското обвинителство се плашеше Кичеец да не се даде во бегство. Сега истото обвинителство се задоволи од само 6 месеци затвор иако во законот постои можност и да се одбие предлог-спогодбата од обвинетиот.
Тие неколку дена притвор на Кичеец ќе му се пресметаат во 6-месечната затворска казна, а тој казната поради кратката должина ќе ја одржува во некоја од полуотворените казнено- поправни домови, најверојатно во охридскиот затвор, наместо во струшкиот каде требаше да биде кога ја направи сообраќајната несреќа.
Целосниот одговор на обвинителството за спогодбата со Милески:
-Основното јавно обвинителство Гостивар првично донесе Наредба за спроведување истражна постапка против едно лице за кривично дело – Тешки дела против безбедноста на луѓето и имотот во сообраќајот според член 300 став 2 во врска со член 297 став 1 од Кривичниот законик.
Надлежниот јавен обвинител спроведе темелна истражна постапка во рамките на која беа наредени и извршени повеќе вештачења за точно утврдување на причините за несреќата. Од резултатите на извршените вештачења произлезе дека осомничениот во критичниот момент немал траги од алкохол или опијати во крв и урина и не ја пречекорил дозволената брзина на патот.
Единствен констатиран пропуст со сообраќајното вештачење е претекнување на полна лента, за што осомничениот призна вина и изјави жалење и каење за стореното кривично дело. Имајќи ги предвид сите утврдени околности, надлежниот јавен обвинител констатираше дека осомничениот го сторил делото од небрежност и дека во конкретниот случај се исполнети елементите на кривично дело – Тешки дела против безбедноста на луѓето и имотот во сообраќајот според член 300 став 4 и став 3 во врска со член 297 став 3 во врска со став 1 од Кривичниот законик.
Осомничениот преку неговиот бранител поднесе предлог-спогодба за признание на вина со која предлагаа условна казна затвор за стореното кривично дело. Надлежниот јавен обвинител го одби ваквиот предлог, па имајќи ги предвид сите околности во предметот и судската пракса на Основниот суд Гостивар, одлучи да постигне предлог-спогодба со која на обвинетиот ќе му биде утврдена ефективна затворска казна од шест месеци. Ваквата спогодба беше потврдена од надлежниот суд.