По победата на гостувањето против Ерменија, македонската фудбалска репрезентација до 21 година во следните два дуели ја очекуваат мечевите против Украина и Франција.
Двата дуели ќе ги одиграме на домашен терен, а предводникот на националниот тим и покрај фактот што за противници имаме две селекции кои се фаворити за највисок пласман очекува продолжување на серијата на добри резултати.
“Сакаме да ја пренесеме таа позитивна атмосфера и на претстојните натпревари против Украина и Франција. Не очекуваат два извонредно тешки натпревари против силни и квалитетни селекции. Фокусот е на дуелот со Украина, мислам дека шансата за освојување на три бода треба да ја бараме на овој натпревар. Франција е апсолутен фаворит во групата. Треба да покажеме пред сѐ квалитет и храбра игра на двата меча. Ќе дадеме се од себе да се претставиме во добро светло пред домашната публика. Повторно се соочуваме со проблеми и отсуство на неколкумина стандардни фудбалери во тимот. Стефан Чолаковски и Метју Божиновски се многу важни за оваа селекција, но за жал и на овие натпревари не добија дозвола од нивните клубови поради здравствени Ковид ограничувања. Агон Елези, исто така многу битен фудбалер поради повреда нема да биде во можност да конкурира за настап. Дополнителен проблем за нас претставува и фактот што голем дел од репрезентативците, посебно од домашниот шампионат немаа голема минутажа во клубовите, но тоа е предизвик со кои се соочуваме веќе извесен период. Сепак, гледаме позитивно и веруваме во наши добри натпревари”, изјави селекторот Драган Канатларовски.
ФОТО: ИГОР ПАНЕВСКИ
