Заврши тендерот за поставување на централен довод за кислород во Инфективното одделение, каде што во моментов се врши реконструкција со европски пари. Директорот на Клиничка болница-Штип, Ален Ѓеорѓијев вели дека тендерот е завршен вчера, а сега следи период за жалби, се надева дека за еден месец ќе биде поставен доводот за кислород до 75 болнички кревети.
– Со оние 47 кревети во модуларната болница и овие 75 кревети, на коишто ќе биде поставен централен довод за кислород, далеку поподготвено ќе дочекаме евентуален есенски бран, бидејќи ќе имаме над 120 кревети, коишто ќе бидат поврзани со централен довод со кислород, она што ни и беше сериозен проблем изминатата година и пол, ги знаете проблеми со боците, со нивното качување или симнување на одделот, вели Ѓеорѓијев.
Во моментов во модуларната болница има тројца пациенти, кои се сомнителни случаи, а направено им е тестирање за коронавирусот и се чекаат резултатите.
Ѓеорѓијев вели дека сите одделенија во Клиничка болница работат нормално, се извршуваат сите операции, а пред две неделни на одделот за Очни болести почнаа и оперативните зафати за катаркта или народски позната како „перде“. Забележа дека како и секоја година во јули и август, хирурзите не извршуваат оперативни зафати за кила и жолчка, а овие зафати, кои можат и да почекаат ќе стартуваат кон крајот на август.