Во логото не се препознава за што се работи и неколку букви или бројки, како и сонце или знаме – не ја презентира триесетгодишната историја на самостојна Македонија. Основоположникот на графичкиот дизајн во земјава, Костадин Танчев – Динка, за Телма го искоментира тоа што Владата го презентира како лого за чествување на триесетгодишнината на независна Македонија. Професорот вели, во дизајнот има едно правило, а тоа е – не е важно кој го прави дизајнот туку кој го нарачува.
Професор Танчев пред нашата камера стручно објасни што тој видел во логото што смета дека е нестручно направено.
Под итно да се повлече ова лого, апелира Танчев. Се уште има малку време преостанато, но сепак доволно според него, за да се направи јавен конкурс и достојно да се чествува триесетгодишнината од независноста на државата.
Логото го објави Владата, а го објаснија со зборовите „сонцето, уставното име, меѓународниот МК код и бројот 30 раскажуваат за нашата државност“. Потоа следуваа реакции во јавноста најмногу околу тоа дали сонцето е приказ на тоа од нашето знаме и дали е направена грешка во приказот. Но, и покрај критиките, од Владата останаа на ставот дека на логото се обединети сите симболи со кои се потенцира јубилејот.
Петар Догов