Архитект Радован Раѓеновиќ, познат и признат по својата интернационална кариера , почина на 81 годишна возраст по кратко боледување.
Роден е 1940 година во Скопје, каде дипломирал 1964 година на Архитектонскиот факултет. А, постдипломски студии завршил 1972 година на интернационалната школа „Бауцентрум“, во Ротердам – Холандија во 1972 година.
Радован Раѓеновиќ е автор на многу станбени, туристичко- угостителски, деловни, индустриски и меморијални објекти, реализирани во земјава и странство. Беше дел од проектантските бироа „Алумина“- Скопје, „Мавровопроект“- Скопје, „Технометал“- Москва, „Будимекс“, во Лавов – Украина и „Студио Р“ – Скопје. Неговите творби го изразуваат модернистичкиот и современ дух на архитектурата. Меѓу нив се деловниот објект за спортска медицина под Калето во Скопје, хотелот „Електро-Скопје“, во Маврово, Олимпискиот базен Скопје, „Еуротел – Струга“, хотелски комплекс Запољарје во Сочи- Русија, Споменикот на слободата во Кочани и др.
За комплексот „Запољарје“ во Сочи, Раѓеновиќ го доби признанието од Сојузот на друштвата на архитекти на Македонија, за афирмација на македонската архитектура во странство во 1981/82 година и дипломата (во 1985 година) , за труд од областа на урбанизмот, проектирањето, ентериерот и дизајнот. За меморијалниот комплекс „Споменик на слободата“, во Кочани, како коавтор со Глигор Чемерски, Радован Раѓеновиќ е носител на повелбата Почесен граѓанин на Кочани. Во 2016 година ја понесе наградата „ Андреја Дамјанов“, за животно дело и за достигнувања во архитектурата, што ја доделува Асоцијацијата на архитекти на Македонија.
