Секој ден од од 15 до 17 часот на три локации во Скопје и во 10 други македонски градови, ВМРО-ДПМНЕ ќе протестираат, сѐ додека владата не го покаже „Патоказот„ за кој преговараат со Бугарија. Протестите во главниот град ќе бидат пред републичкото Собрание, пред ТЦ „Мавровка“ и пред зградата на поранешна „Нова Македонија“. Повикувајќи се на сериозни дипломатски извори, лидерот на ВМРО-ДПМНЕ, тврди дека двоецот Заев-Бучковски преговара со техничката бугарска влада, делови од декларацијата, која беше усвоена во бугарскиот парламент во 2019 година да станат дел од преговарачката рамка.
Според Мицкоски, има две решенија за Македонија да добие зелено светло за отпочнување преговори за членство во ЕУ. Првото решение, за кое смета дека е најмалку веројатно, е Европскиот совет да донесе одлука без условувања и да извршат притисок врз бугарскиот претседател Румен Радев и техничката влада. Но, за ова да се случи, според проценките, шансите се 5 отсто.
Во второто решение, има две варијанти. Првата е, владата да ги прифати условите кои се дел од бугарската декларација, да бидат дел од преговарачкиот процес во првите пет поглавја, што значи дека директно ќе преговараат за идентитетот, јазикот и за културата, и тоа, според него, ќе бидат преговори без крај.
Втората варијанта е, сите овие барања да бидат прифатени усно со изговор дека Бугарија има техничка влада и дека преговорите за спорот ќе продолжат откако ќе се формира новата влада..Тој за ова го информирал и претседателот Стево Пендаровски, за кој вели дека не ги дели владините ставови. Никој од Владата досега не комуницирал со опозицијата околу преговорите, а доколку не се даде преговарачкиот документ на увид, ВМРО-ДПМНЕ ќе преземаат и други активности, како институционални блокади.
Далиборка Демјанска Цветановска