Инсулин, ленти и игли има во сите инсулински депоа и аптеки во земјава, но поради технички проблем оваа терапија за над 40.000 дијабетичари е недостапна.
Проблемов е стар веќе трети месец, аламираше денеска од Штип, сојузот на здруженија дијабетичари на Македонија.
Побараа Министерството за здравство, а посебно ги повикаа надлежните од „Мој термин“ да го решат, бидејќи се оставени на милост и немилост.
На прес-конференцијата се приклучи и Петре Петров, кој 25 години е зависен од инсулинска терапија. Преку сопствениот пример и битката да се стаса до терапијата, сликовито го презентираше проблемот.
Наместо да добие 30 игли, добивал по 10.
Од Министерството за здравство тврдат дека инсулин има, а проблемот е настанат поради софтверот.
Изминатиов период поради промена во софтверот за нов вид на инсулински продукти – игли Тип1 и Тип2, како и апаратчињата за мерење гликемија кои не ги препишува лекар, туку системот сам ги генерира, не се издаваа истите, се вели во соопштението од Министерството за здравство.
Посочуваат дека проблемов веќе се надминува и од вторник кога ќе бидат отворени сите инсулински аптеки терапијата ќе биде достапна за сите пациенти.
Викторија Јованова