Осум месеци затвор доби екс-директорот на затворот во Шутка, Филип Андов Сокол обвинет за злоупотреба на службената положба, а на шестмината затворски полицајци, Кривичен им пресуди условна. Обвинети се дека им овозможиле на петмина осуденици во девет наврати незаконски да бидат спроведени до нивните домови и на други локации за приватни потреби, без да се испочитува процедурата.
Андов, кој е член на Извршниот одбор на СДСМ, гледа политичка позадина во целиот случај. Тврди дека ниту сведоците на обвинителството не ја потврдиле тезата на обвинението, а судот не направил разлика меѓу молба за излегување од затоврот со спровод од погодностите за кои одлучува комисија.
Одбраната ќе се жали на пресудата. Од обвинителството за гонење на организиран криминал и корупција (ОЈО ГОКК) ќе се произнесат откако ќе го прочитаат образложението на пресудата.
„По добивање на пресудата и проучување на наводите во неа, ОЈО ГОКК ќе донесе одлука дали истата ќе ја обжали“, велат од ОЈО ГОКК.
Судењето почна на крајот од летото. Обвинетите негираа вина, а екс-директорот тврдеше дека сите работеле законски и дека не ја ставиле во ризик безбедноста на затворот.
Обвинителката, пак, тврдеше дека спровод на осуднеици е дозволен само до институции, а не како во конкретниот случај кога биле носени дома.
Елена Ивановска Мукоска