Блокадите на грчките фармери на клучни автопатишта во Грција предизвикаа километарски колони и повеќечасовни доцнења, токму во периодот кога празничниот сообраќај е засилен. На некои делници, како кај Рицона, колоните достигнаа и до девет километри, додека возачи, следејќи GPS-насоки, завршуваа на споредни и земјени патишта.
Полицијата побара од учесниците во блокадите да отворат најмалку две ленти во секоја насока за непречено движење. На одредени локации тоа беше прифатено, но на други преговорите продолжија, при што сообраќајната полиција ја носеше конечната одлука за безбедно пропуштање на возилата, особено за итни случаи.
Фармерите порачуваат дека протестите ќе продолжат и дека блокадите нема да се повлечат, поставувајќи илјадници трактори на клучни точки. Одлуки за следните чекори се очекуваат по собирите на учесниците, закажани за крајот на неделата.