Пристигнаа 5.000 кинески вакцини на Синофарм во штипската сала „Јордан Мијалков“. Сместени се во фрижидерите,а утре од 8 часот ќе биде отворена салата во која има 22 вакцинални пунктови.
Овде против Ковид-19 ќе се имунизираат граѓаните од општините од штипскиот и струмичкиот регион. Матичните лекари во текот на денов на пациентите кои имаат интерес за имунизација ќе почнат да им закажуваат термини.
Над 80 отсто од здравствениот персонал на овој вакцинален пункт се од штипскиот Здравствен дом и Клиничка болница, останатите 20 ќе ротираат од здравствени институции од двата региони.
За првите денови на помош ќе доаѓаат медицински кадар од Радовиш, Виница и Кочани.
Спуштена е возрасната граница за вакцинирање, минатата недела на пунктовите во здравствените домови се вакцинираа пациенти на 73 години. Пунктот во Штип се подготви за само пет дена, а за негово опремување беше задолжена Општина Штип, која по пат на донации од 30 тина штипски компании ги обезбедија сите технички услови.
Граѓаните кои ќе доаѓаат од општините од источниот и југоисточниот регион до салата „Јордан Мијалков“ во населбата Сењак ќе пристигнуваат без проблеми, на булеварот „Гоце Делчев“ поставени се патокази, а пред пунктот се обележани и паркинг места.
Викторија Јованова