Покрај победата во првиот круг во три општини, победивме во уште три во вториот круг, тоа се Центар, Македонска Каменица и Зрновци. Досега шест градоначалници и очекуваме резултати од уште неколку општини во кои резултатот е тесен, рече лидерот на СДСМ, Венко Филипче на прес-конференција вечерва.
„Мора да информирам дека во изминатите две недели, во очи на вториот круг на изборите, се вршеше огромен притисок на сите кандидати на СДСМ во овие 17 општини во кои влеговме во вториот круг. Не се бираа ниту средства, ниту методи и тоа само говори дека се соочуваме со истата деструктивна власт на ВМРО-ДПМНЕ како во минатото каде што практично ги злоупотребува сите институции кои што им се под контрола“, рече Филипче, кој патем им ја честита победата на сите градоначалници од сите политички партии на локалните избори.
Според изборниот резултат на советничките листи, СДСМ е втора партија во земјата и прва во опозицискиот блок. Тој порача дека нема да поднесе оставка.
„Не, јас кажав и минатиот пат, јас сум претседател многу краток временски период, година и неколку месеци. Сметам дека тоа што се направи во партијата во изминатиот период, после таков, навистина, катастрофален пораз лани, беше една консолидација. Меѓутоа, секако дека овие избори се дополнителен показател од кој што ќе влечеме пораки и поуки за иднина, затоа пто процесот продолжува силно да се бориме против оваа власт. Сметам дека тоа што успеавме во изминатиот период да ги разобличиме лажните политики на власта која што изгуби, еве веќе 130.000 – 140.000 гласови за само година и пол е делумно и наша заслуга“, одговори Филипче.
С.Д.