Врачена наградата „Даница Ручигај“ на Александра Јуруковска

На литературната критичарка и новинарка за култура, Александра Јуруковска денеска и беше врачена наградата „ Даница Ручигај“, која што Друштвото на писатели на Македонија ја доделува од оваа година за најдобра небјавена поетска книга. Јуруковска ја доби наградата за нејзината прва збирка песни „ Ткажалки“.  Лауреатката победи во конкуренција од 10 пристигнати поетски ракописи, на конкурсот што го објави ДПМ од 18 јули до 18 август. Зад одлуката Александра Јуруковска да ја понесе наградата стои тричлено жири , со кое претседаваше Лулзим Хазири. Наградата се состои од плакета и објава на ракописот на Јуруковска во новата едиција „ Даница Ручигај“, на ДПМ.

• Сакам да и честитам на Александра Јуруковска и уште еднаш да се заблагодарам за тоа што учествуваше, затоа што имаше доверба во процесот, во организацијата. И што покажа уште еднаш дека најубавите работи се случуваат кога се има верба во нештата, кажа Живко Грозданоски- претседател на ДПМ.
• Искрено се радувам на наградата „ Даница Ручигај“ затоа што го носи името на една од најважните македонски современи поетеси, прерано и одамна замината. Меѓутоа, ова е начин на кој и оддаваме почит на неа и нејзиното творештво живее. Се радувам затоа што ова е моја прва книжевна награда, за мојот прв поетски ракопис. И не може човек да не биде благодарен кога тоа е препознаено од Друштвото на писатели на Македонија, рече Александра Јуруковска , лауреатка на наградата „ Даница Ручигај“.