Дали Градоначалникот на Центар Саша Богдановиќ и сам се сместил на преспивање во хотел за да може да се дружи во ресторан и во полициски час со гостите од Белград?! Вчера тој беше лоциран на видео за кое опозициската ВМРО-ДПМНЕ тврдеше дека е во кафуле во Дебар Мало.
Дојава добиле и пазарните инспектори. Тие биле на лице место, но рацете им биле врзани. Според документите, Богдановиќ бил пријавен како гостин со спиење во хотелот, и немало прекршување на протоколите. Инаку хотелите можат да служат храна за своите гости до 20 часот, но гостите и потоа можат да седат во ресторанот.Но во 22,40 кога дошле инспекторите, таму немало никого.
Богдановиќ со реакција се јави утрово. Демантираше дека седел во каферани за време на полициски час и дека кршел закони. Во текот на вчерашниот ден, сместував гости во хотел дојдени од Белград и кошаркарот на Работнички кој е најновото засилување во нашиот клуб, напиша Богдановиќ На Фејсбук.
„За сето сместување и престој поседувам документација и сведоци. За да се расчисти целиот случај и да се докаже вистината сите аргументи ги доставив до сите надлежни органи. Воедно барам извинување за напишаните текстови во рок од 24 часа и објава на мојата реакција. Во случај да не се случи тоа ќе покренам граѓански спор.“
Опозициската ВМРО-ДПМНЕ пак побара оставка и најави кривична за Богдановиќ. Богдановиќ станал гостин, откако беше фатен на лице место како крши закони и полициски час, реагираше ВМРО-ДПМНЕ.
„Оправдувањата на Саша Богдановиќ за кршење на закони и полициски час се неоправдани. Играчот Аска уште пред неколку дена е дојден во Скопје, а на 17-ти април настапил и на мечот во СРЦ Кале против Гостивар каде го има во официјалната статистика. Не може да биде оправдување седењето во кафеана во полициски час, која е отворена специјално за него, работи само за него, и келнерите служат само за него.“
До сега имаше примери како политичари и функционери беа фатени на дело како прекршуваат полициски час. Но освен рекции и осуда од јавноста, до сега немаше никакви сакции за нив.
Александра Филиповска