Претставата „Животот на провинциските плејбои по Втората светска војна или Туѓото го сакаме – своето не го даваме“ , по текст на Душан Јовановиќ, а во режија на Иван Пеновиќ, на 23 октомври ќе има македонска премиера во Драмскиот театар -Скопје Претставата е прв копродукциски проект на фестивалот РУТА во кој партиципира Драмскиот театар како претставник на Македонија. Работена е како копродукција на Драмски театар- Скопје, Белградскиот драмски театар, Градскиот театар од Љубљана и фестивалот „Град театар“ Будва.
Премиерата на „Плејбоите..“ се одржа на 10 август на фестивалот „Град театар“- Будва, каде што имаше 4 изведби. Играњето на летните сцени продолжи со учеството во драмската програма на фестивалот „Охридско лето“, а последната фестивалска изведба беше на Бриони, во рамките на фестивалот РУТА.
- Заедничка констатација од досегашните гостувања е задоволството на публиката и уживањето во маестралната изведба на традиционалната форма на Комедија дел арте на режисерот Иван Пеновиќ, се вели во дописот од Драмски театар.
Во претставата играат актери од четирите театарски куќи -копродуценти во проектот: Лазар Христов, Јулита Кропец, Марко Гверо, Соња Стамболџиоска, Лазар Николиќ, Вукашин Јовановиќ, Нејц Језерник, Марјан Наумов и Јована Спасиќ.
Според директорот на Драмски театар, Роберт Вељановски, нивната сатисфакција од реализацијата на претставата е повеќеслојна.
- Сите четири институции што застанаа зад овој проект, кој што наназад 2-3 години тлееше како идеја на хартија, во рамките на Регионалната унија на театри – РУТА, се реализираше со оваа претстава. Станува збор за прва четирипартитна копродукција. Сега со сигурност можеме да кажеме и пред самите себе си и пред нашата публика во регионот, дека сме кадарни и дека нашите театри се на исклучително високо рамниште, дека квалитетот, ентузијазмот и уметничкиот порив за творење и надвор од рамките на нашите матични театри е силно изразен кај сите нас. Она што мене ме прави горд е што претставата се подготвуваше во Скопје и во неа учествува и помошно-техничкиот персонал на Драмскиот театар. Во овие услови кога театарот како објект не располага со опрема на завидно ниво, нашите луѓе, актерите, уметничкиот тим, техничарите на светло и звук, декоратерите, столари, како и нашите вработени шивачи, гардеробери, луѓето задолжени за театарска шминка и фризура, сите до еден се исклучителни професионалци и подготвени да ги исполнат високите естетски критериуми на оваа регионална копродукција, кажа Вељановски.
Во програмската режисерска белешка за претставата е истакнато дека: „Животот на провинциските плејбои по Втората светска војна или Туѓото го сакаме – своето не го даваме“, е текст од раниот драмски опус на Душан Јовановиќ, напишан во форма на Комедија дел арте. „Плејбоите…“ се напишани во 1972 година, а првпат се изведени во Местно гледалишче Љубљана, една година подоцна. Напишани се во периодот на исклучително бурни меѓународни и регионални историски движења, во духот на „Сексуалната револуција“ и „Пролетта од 1968 година“, како и под влијание на околностите во тогашна Југославија на кои реагираа уметниците од најмладата генерација. Во нивните дела е присутен таканаречениот „лудизам“ – специфичен одговор на „тешките теми“ што ги отвори повоената генерација млади луѓе. Лудизмот се карактеризира со целосно отсуство на каква било потрага по смисла, одговори или решенија за егзистенцијалните тешкотии; тој повеќе ги прифаќа работите такви какви што се и, наместо да бара излез во дадените околности, дозволува настаните да се одвиваат низ „опуштена игра“. Сето ова важи и за „Плејбоите…“. Тоа е вителот на живата еротика, младоста и незаузданата, вечно незаситна страст. Сепак, меѓу редови се насетува и една празнина, суета и егоизам на општеството што постојано трча по уживање. Денес, половина век по ‘68, суетата и бесцелноста остануваат актуелни, а им се придружуваат и трката по материјалниот статус, но и егзистенцијалниот страв.“
Покрај Иван Пеновиќ, авторскиот тим го сочинуваат и Соња Должан (превод), Лазе Трипков (сценографија), Александар Ношпал (костимографија), Владимир Пејковиќ (композиција) и Дамир Клемениќ (сценско движење).