Нов мурал на најславниот уличен уметник во светот, Банкси, се појави на зградата на Кралскиот суд во Лондон. На последното дело на Бански е прикажан судија, облечен во традиционалната гардероба на британските судии, со чекан во раката како удира демонстрант чија крв го испрскала и плакатот кој го држи во раката.
Иако на плакатот не може да се прочита никаква порака или мотив за протестот, овој мурал се смета за коментар на забраната на владата на Обединетото Кралство на групата „Палестинска акција“. На протестот против оваа одлука кој се одржа во сабота во Лондон, повеќе од 900-тини лица беа уапсени.
Полицијата денеска веќе го покрила последното дело на Банкси со црна пластика и го оградила со две метални бариери.
Британските власти тврдат дека бидејќи Кралскиот суд во Лондон е објект од историско значење, изграден пред 143 години, муралот ќе биде отстранет.
Но, во времето на социјалните медиуми, пораката на Банкси, кој на својот профил на Инстаграм го сподели муралот со светската јавност, веќе се прошири низ целиот свет.