Ден по пожарот во фабриката за кондиторски производи Макпрогрес Винчини се уште над погоните се крева чад. Пожарот е локализиран, а пожарникарите се уште се на терен, со цел да не се разгори огнот, на околните објекти. Телма и денеска беше на лице место, каде што синоќа гореа магицините и производствените погони 6,7 и 8 во најголемата фабрика за производство на кондиторско-пекарски производи во источниот регион. Инаку во пожарот се повредени пожарникари, доброволци и вработени во фабриката Макпрогрес Винчини. Во Општата болница во Кочани се примени 25 повредени лица, од кои пет со изгореници, а останатите вдишале чад. Четворица од повредените со изгореници на стапалат и екстремитети се пожарникари. Штипскиот пожарникар симнувајќи се од кровната конструкција настапнал во растопен шеќер. Пожарникарските чизми останале во жешката смеса.
-Носеле комплетна заштитна опрема, еден од повредените е пожарникарот кој што при гаснење на пожарот се заглавил во смола, во еастпен шеќер каде што се заглавил со обувките, но со брза акција на неговите колеги, брзо е извлечен и во моментот е на болничко лекување. Сите се стабилни пациенти во добраљ општа здравствена состојба. И се надеваме дека наскоро ќе бидат пуштени на домашно лекување, изјави Катерина Паниќ-Мирчовска директор на Општа болница Кочани.
Осумина пациенти на возраст од 23 до 53 години меѓу кои и две жени се хоспитализирани на Клиниката за токсикологија во Скопје. Сите пациенти се вработени во фабриката Макпрогрес и направени им се сите испитувања.
-Дел од нив се третирани подолго време со кислородна терпија исто така имаат и медикаментозна терапија. Со тоа што сакам да нагласам дека и во медицинскиот центар во Кочани како дел од првата помош на пациентите им била ординирана медикаментозна терапија и обезбеддена кислородна поддршка. Според нашите првични клинички наоди, пациентите се во клинички стабилна состојба и се се уште задржани на клиниката за понатамошен третман и опсервација, вели за Телма доктор Жанина Переска од Клиниката за токсикологија во Скопје.
Јавниот обвинител бил на терен, но увидот се уште не е започнат, затоа пожарот не е во целост изгаснат и се уште траат активностите за обезбедување на локацијата. Според првичните информации во големата огнена стихија изгореа околу 5.000 метри квадратни од производствените погони.
-Има опожарено три погони, еден магацин, површина околу 5.000 метри квадратни. Има повредени пожарникари, доброволци и дел од вработените, изјави Миле Петков градоначалник на Виница.
Во гаснењето на пожарот учествуваа пожарникари и доброволци од Виница, како и од останатите градови од регионот. Фабриката Макпрогрес е формирана пред 35 години, вработува над 500 лица. Извозно ориентирана компанија, над 70% од производи завршуваат на пазарите во над 50 земји низ светот. Материјалната штета е голема, којашто и дополнително ќе се утврдува.
Викторија Јованова