Научниците открија нова и мистериозна класа на објекти во Сончевиот Систем, наречени „темни комети“. Овие вселенски карпи изгледаат како астероиди, но се движат како комети – забрзуваат на неочекуван начин, иако не испуштаат гасови или прашина како типичните комети.
Досега се откриени 14 вакви објекти, а нивното однесување останува неразјаснето.
Јапонската сонда „Хајабуса2“ е на пат кон еден од овие објекти – темната комета „1998 KY26“, пишува „Би – Би – СИ“. Иако мисијата првично не била планирана за оваа цел, оваа случајна можност ќе ѝ овозможи на науката првпат одблиску да го истражи овој феномен.
Сондата ќе пристигне до целта во 2031 година и може да го анализира составот и можната внатрешна активност на темната комета.
Темните комети се особено важни затоа што можеби носат одговори за тоа како водата стигнала на Земјата. Но тие исто така претставуваат потенцијална закана – поради нивната неочекувана промена на движењето, тешко се следат и предвидуваат.
Научниците сега бараат начини за подобро следење на овие објекти за да ја заштитат планетата од можни идни судири.