Пописот итно да се одложи до јуни или на неодредено време, предлага Демократскиот сојуз и бара подршка од сите политички партии. Влошената епидемилошка состојба, ширењето на вирусот, големиот број заразени, исполнети здраствени капацитети, немањето вакцини и опасноста од бојкот се дел од причините за одложување на најголемата статистичка операција.
Павле Трајанов предупредува дека доколку тоа не се стори пописот нема да биде успешен а резултатите ќе дадат искривена слика на состојбите, посебно на оние за вкупниот број на населението и нивната етничка припадност.
Итно одложување на пописот бара и ВМРО-ДПМНЕ. Дел од раководството на партијата јавно проговорија дека нема да им отворат врата на попишувачите.
Власта не попушта. Убедени се дека пописот може да се спроведе без проблеми само доколку се почитуваат безбедносните протоколи. И покрај тоа што дел од попишувачите и инструкторите се заразени, стартот на статистичката операција ќе биде на 1 април, велат од СДСМ.
Пописот ќе биде и една од темите на тет-а-тет средбата што во понеделник треба се случи меѓу Заев и Мицкоски. За пописот телефонски разговарале и лидерот на опозицијата Мицкоски со заменик државниот секретар на САД за Европа и Евроазија, Метју Палмер. Амбасадата на САД во Скопје соопшти дека од Мицкоски било побарано да биде конструктивна опозиција и да има комуникација со останатите во општеството во врска со претстојниот попис и отворениот спор со Бугарија.
Јулијана Пешевска