Ракометната репрезентација на Македонија со вечерашниот меч против Данска ги продолжува настапите во квалификациите за Европското првенство. По стартните две победи во соочувањата со Финска и Швајцарија не очекува нов предизвик, а тоа дуелот против актуелниот светски и олимписки првак.
“Натпреварот против Данска е можност да покажеме дека настапот на Светското првенство беше само една лоша епизода. Добро се подготвивме во овие неколку дена и во соочувањата со актуелниот светски и олимписки првак ќе се обидеме да играме најдобро што можеме и да го поправиме впечатокот од Египет”, истакна Жарко Пешевски.
Ракометарите на овие подготовки се најдоа во ситуација, капитенот и нивниот соиграч да има уште една улога, а тоа е селекторската. Нашиот најдобар ракометар, Кире Лазаров токму во мечевите против Данска ќе дебитира на новата функција.
“Во прв момент ни беше чудно, но бргу се вклопуваш во новата ситуација. Твојот соиграч и пријател сега е и селектор. Функционираме многу добро и се надевам дека таа врска ќе биде уште подобра и во иднина ќе се радуваме на многу успеси”, заврши кружниот напаѓач.
Натпреварот против Данска се игра вечерва во А1 арената Борис Трајковски, а почетокот е закажан за 20 часот. Во вториот дуел од нашата група Финска ја пречекува Швајцарија и овој меч стартува од 17 часот.
ФОТО: Игор Паневски