Постапката за набавка на хардвер, софтвер, терминали, обука и други неопходни подготовки за воведување на новиот начин на гласање – се уште не може да почне. МВР, кое единствено располага со базата на отисоци од прст, нема законско овластување да и даде вакви податоци на ДИК, која потоа би ги внела во електронските изводи на Избирачкиот список. Без правно решение, велат од ДИК, не може да почне тендерската процедура. Неопходни се измени на Изборниот законик на барем два члена, што треба Министерството за правда да ги предложи до Собранието. Ова беше констатирано на средбата меѓу министерот Оливер Спасовски и членовите на ДИК. „Спасовски ја потенцирал потребата од формирање заедничка работна група, која ќе ги реши сите дилеми, но и нужноста од генерална стратегија за сајбер безбедност“, се вели во соопштението од МВР.
Од Владата апелираат ДИК што поскоро да почне со набавката на потребната опрема и уверуваат дека проверката на гласачите преку фингерпринт ќе внесе дополнителна доверба во изборниот процес.
Опозициската ВМРО ДПМНЕ исто така инсистира да се почитува законот и гласањето со отисок од прст да се примени веќе на локалните избори на есен. Тоа треба да ги исфрли од употреба спрејот и уве ламбата, кои се користеа за да се утврди дека лицето гласало само еднаш. Проверката ќе се прави со посебни терминали, во кои ќе бидат внесени изводи од избирачките списоци, на кои, покрај името, адресата и фотографијата, ќе стои и отисок од показалец. Соседна Албанија ќе ја примени оваа процедура на изборите оваа пролет.
Соња Николовска
