Даниел Дубуа го нокаутираше Ентони Џошуа и ја задржа светската титула во ИБФ во тешка категорија во бокс. На спектаклот пред 96.000 гледачи на „Вембли“, аутсајдерот го изненади фаворитот.
Дубуа доминираше во текот на целата борба и пред нокаутот го испрати Џошуа на подот неколку пати. Нокаутот дојде во 5.рунда од мечот, а поранешниот унифициран светски шампион не можеше да стане од подот.
За младиот 27-годишен боксер ова беше 22.победа во кариерата од кои 21-ва со нокаут. Досега има два порази и тоа од Олександр Усик и од Џо Џојс. За Џошуа, кој полека го губи елитниот статус, ова беше четврти пораз во кариерата по двата од Усик и Енди Руиз. Останува на 28 победи од кои 25 со нокаут.
Во договорот за борбата, Џошуа има опција за реванш против Дубуа, што најверојатно ќе ја искористи за повторно да се сретне во рингот со помладиот ривал.