Во моментот работат сите три блока од РЕК Битола, информираат од државниот производител на струја ЕСМ. Сите активности за подобрување на стабилноста и производството на електрична енергија се завршени, велат во компанијата.
Во МЕПСО велат дека проблемите се надминати уште минатиот месец и нема никакви пречки, ниту ограничувања од преносната мрежа на АД МЕПСО за непречено функционирање на сите производствени капацитети на АД ЕСМ.
Во втората половина на јануари, среде грејна сезона, работеше само вториот блок од РЕК Битола.
Третиот беше исклучен поради одржување, а првиот не можеше да биде вклучен на мрежа поради дефект на далноводот. ЕСМ и МЕПСО си ја префрлаа одговорноста по чија вина не може да се вклучи блокот од најголемиот производител на струја на земјата.