Штефан Крафт победи во Закопане и постави нов рекорд со 109 подиуми во кариерата во рамки на Светскиот куп во ски скокови. Триумфот на Крафт значеше и славје за репрезентацијата на Австрија на Полската турнеја.
Крафт до победата во Закопане дојде со вкупно 323,3 поени и скокови од 137 и 134 метри. Зад финишираше Андреас Велингер од Германија додека трет беше Анже Ланишек од Словенија.
Австриецот сега има седум индивидуални победи сезонава и очекувано е лидер во генералниот пласман со 1.089 бодови, втор е Велингер со 837, а Кобајаши е трет со 736.
Селекцијата на Австрија ја освои титулата на Полската турнеја, па членовите на тимот ќе поделат награда од 50.000 евра. Словенија беше втора, а Германија финишираше на третото место.
Во Светскиот куп следува кратка пауза, бидејќи следниот викенд се одржува Светското првенство во ски летови во Бад Митерндорф.
