Нема договор за уставни измени, Изборниот законик ќе се менува само во однос на препораките на ОБСЕ/ОДИХР, а изборите ќе бидат споени. Ова е епилогот од денешната лидерска средба, што се одржа во Собранието.
Ковачевски информираше дека на синоќешниот состанок на Извршниот одбор на партијата е одлучено да ја почнат постапката за кандидат за претседател, а е договорено и да се формира предизборен широк Европски фронт.Опозицискиот лидер го повтори ставот дека сега нема услови за уставни измени, но измените на Изборниот законик ќе бидат донесени и покрај тоа што има забелешки дека се носат шест месеци пред избори.
Мицкоски е загрижен што не се пополнува испразнетото место во ДИК, за кое смета дека и припаѓа на албанската опозиција. А токму поради ова прашање и Европскиот сојуз за промени денеска ја напуштија лидерската средба, обвинувајќи го собранискиот претседател дека подготвува изборен фалсификат.
Во следните неколку дена се очекува да бидат донесени измените во изборниот законик, а техничка влада ќе биде формирана веќе на 28 јануари.
Далиборка Демјанска Цветановска