Завршенa е вонредната инспекција од Државниот здравствен и санитарен инспекторат по смртта на 41 годишната Руменка Довичинска од Берово, за која што нејзината ќерка преку статус на фејсбук напиша дека вечерта кога нејзината мајка починала над десет пати ѕвонела и испраќала пораки до дежурните сестри, молејќи се за кислород и медицинска помош. Заклучоци за пропусти на медицинскиот персонал во соопштението нема, топката се префрла на Комисија за следење на квалитет. На директорот Ален Ѓеорѓијев му е наредено да се состане Комисијата која ќе ја утврди состојбата за спроведеното лекување на пациентката.
Независно од работата на Комисијата, во текот на денешниот ден ДЗСИ ќе иницира стручен надзор над работата на здравствената установа и здравствените работници во врска со третманот на пациентката до Министерот за здравство, соопштуваат од ДЗСИ.
Георгијев вели дека уште ја чека одлуката на нивната комисија, а резултатите ги очекува утре. Најавува промени во организацијата на работата на инфективно, а од вчера има и две дополнителни телефонски линии за пациентите.
Да ги почекаме резултатите од Комисијата за да видиме имало ли пропусти во лекувањето. Можам само да кажам дека ќе има организациски промени на инфективно, рече Ѓеорѓијев.
Во штипскиот ковид центар исполнети се сите кревети и во него се лекуваат 69 пациенти. Државниот здравствен и санитарен инспекторат досега има иницирано стручни надзори за 12 починати пациенти од коронавирусот, два во Струмица и по еден од Свети Николе и Ресен, а во тек се и инспекциски надзори за починати пациенти од коронавирусот во Тетово, Крива Паланка, Битола и Кавадарци. Инспекторите ќе бараат одговори и за уште 4 починати пациенти на клиниките во земјава.
Викторија Димитрова Јованова
