Претседателот Стево Пендаровски, запрашан зошто повторно не се прогласи вонредна состојба, објасни зошто во моментот не е потребно такво нешто, односно зошто според него вонредна состојба во моментот, како што рече, не врши работа.
-Претходно прогласивме вонредна состојба, но сега тоа не е потребно бидејќи сеga имаме функционално Собрание. Претходно тоа се направи за да може Владата, наместо Собрането, да носи закони. Не ни е потребна вонредна состојба за да прогласиме полициски час, едното со другото не е поврзано, истакна Пендаровски.
Тој додаде дека и без вонредна состојба, армијата е ангажирана во некои земји, а истото можеме да го сториме и ние.
-Армијата е ангажирана во некои земји. Работат дури и епидемиолошки анкети. Доколку е потребно и јас ќе дозволам ангажирање на војниците, односно армијата да биде логистичка потреба, истакна Пендаровски.
Дека во моментот нема потреба од вонредна состојба истакна и премиерот Зоран Заев.
Во своето обраќање, претседателот рече дека бројката на новозаразени и починати од ковид 19 кај нас е алармантна, но не постојат мерки кои се предложени од СЗО, а да не се преземени кај нас.
„Не сакам да барам оправдување за секој потег на нашите власти кој е преземен во последните осум месеци, меѓутоа во однос на сетот на мерки кои нашите здравствени авторитети ги применуваат, јасно е дека не постојат мерки кој се препорачани од СЗО или се применуваат во некои други држави и даваат позитивни ефекти, а не се применуваат кај нас. Главнината на здравствените мерки е иста, разликата е само во нивото на нивно почитување од страна на граѓаните и нивото на имплементација на законите од страна на државните институции“, изјави Пендаровски.