Италијанска доминација на спустот во Кран Монтана

Софија Гоџа е победничка на спустот во женска конкуренција што се возеше на патеката во Кран Монтана, а се бодува за Светскиот куп во алпско скијање.

Италијанката на целта пристигна со време од 1 минута 26 секунди и 81 стотинка и за 15 стоти дела беше побрза од сонародничката Федерика Брињоне додека третото место и припадна на Лора Гош од Франција која зад победничката заостана 41 стотинка.

Со овој триумф Гоџа се зацврсти на лидерската позиција во редоследот за спуст со 580 бода, 179 повеќе од Словенката, Илка Штухец, а трета е Елена Куртони со 290.

Во генералниот пласман за Светскиот куп убедливо на чело е Микаела Шифрин со 1697 бода пред Петра Влхова со 977, а на третата позиција се наоѓа Лара Гут Бехрами со 928.