Министрите за надворешни работи на Македонија и Бугарија разговарале околу последните случувања и најавите од бугарската страна дека ќе ја блокира земјава во Европската унија.
Без да прецизира кога комуницирал со колешката Захариева, Османи изјави дека и ги кажал македонските „црвени линии“, а за меморандумот на Бугарија до земјите членки на Унијата искоментира дека отстапува од рамките на Договорот за добрососедство.
Двајцата министри за надворешни, се договориле да се засили комуникацијата помеѓу двете земји и тоа на највисоко ниво.
„Обврските коишто прозилегуваат од Договорот, она што е продукт од работата на Комисиите во наоѓање на заедничи на одбележување на историски фигури и начин на интерпретирање на историски епохи, тоа е обврска која што е преземена и треба да продолжи, вклучувајќи го и прашањето за Гоце Делчев. Имав комуникација и ги отворивме и овие прашања и јасно ги искажав и моите ставови. Јас сум убеден дека пристапот е интензивирање на комуникацијата“ изјави министерот за надворешни работи, бујар Османи.
Министерот за надворешни работи на прес-конференција се осврна и на приоритетите на неговото министерство во мандатот на новата Влада.
Добрососедските односи се на врвот на приоритетната листа. Се најавува и отворање на шест нови гранични премини со соседите.
Од Македонија да започне дебалканизацијата на регионот, а преговорите со ЕУ да донесат политичка стабилност за да може фокусот да биде ставен на економскиот напредок – во ваков правец властите најавуваат дека ќе ја водат надворешната политика.
„Навистина е логично во претстојниот мандат не само да ги задржиме туку и да ги интезивираме релациите, да ја засилиме комуникацијата буквално со сите соседи и да си зацврстиме темелите на кои ќе го изградиме нашето стабилно и долгорочно пријателство“ вели Османи.
Во однос на барањето на ВМРО-ДПМНЕ – меморандумот на Бугарија до земјите членки на ЕУ да се разговара и во Собранието, Османи порача дека е отворен за комуникација со опозицијата, но нема да дозволи неговото министерство да биде основа за собирање дневнополитички поени.
Петар Догов