Откако не успеа да мине во втората фаза од квалификациите за Светското првенство, кошаркарската селекција на Македонија мора да биде дел од претквалификациите за настап на континенталниот шампионат.
Во овој циклус влегуваме со нов селектор, а Александар Јончевски верува дека и покрај сите проблеми со кои се соочува може на стартот да стигне до две победи.
“Можеби групата звучи неатрактивно, со Норвешка, Данска и Словачка, но ни влева голема надеж дека ќе го освоиме првото место кое единствено води во следната рунда. Норвешка и Данска како скандинавски земји вложуваат доста во кошарката и самото тоа дека нивните селекции во младинските категории се во А-дивизијата, а не можеме ние да се пофалиме со тоа, дава за право дека групата е тешка. Со Словачка игравме двапати во скоро време и во турнирски систем имавме победа од 20, но и пораз од скоро 20 разлика. Ниедна селекција нема квалитет со кој ќе отскокнува, туку моменталната атмосфера и мотивација ќе го реши победникот на овој натпревар. Се надевам дека ќе успееме да внесеме една добра енергија и можам да ветам дека ќе бидеме подготвени за било што во однос на противниците”, изјави Јончевски.
ФОТО: Игор Паневски
