Александар Јончевски е нов селектор на кошаркарската репрезентација на Македонија и на чело на националниот тим доаѓа како замена за Драган Бајиќ, кој вчера се повлече од функцијата.
Четириесет и едно годишниот Јончевски во изминатиов период беше дел од стручниот штаб, а на два меча од квалификациите за Светското првенство и ја предводеше селекцијата бидејќи Бајиќ мораше да замине во изолација поради позитивен тест на Ковид-19.
Јончевски беше дел и од стручниот штаб на Марјан Србиновски на Европското првенство во 2015-тата, беше дел од тренерскиот тим додека репрезентацијата ја водеа Марјан Лазовски и Јорданчо Давитков.
Во соопштението на Федерацијата се истакнува дека меѓу помошниците на Јончевски ќе бидат актуелните селектори на репрезентациите до 20 и 18 години, Никола Василев и Никола Велев, а за физичката подготовка ќе биде задолжен Сашо Пецев.
Јончевски на новата функција ќе дебитира на 25 август во првиот претквалификациски дуел за пласман на Европското првенство против Данска, а три дена подоцна во Скопје го очекува дуелот со Словачка.
ФОТО: Игор Паневски