Францускиот предлог – силно поддржан од уште еден европски политичар: бугарскиот премиер во оставка, Кирил Петков, го смета за исклучително добар. Веројатно многу придонесува за високата оценка од 5,50, од можни 6, што Петков ѝ ја напиша на министерката за надворешни работи Теодора Генчовска, иако доаѓа од партијата на Слави Трифонов.
Францускиот предлог е исклучително добар. Тој направи бугарските позиции да станат и европски. Она што сега се случува во Северна Македонија е поради тоа што ним им е многу тешко да ги прифатат тие позиции во моментот, но тие треба да сфатат дека ако Македонија сака да се развива, европскиот пат е единствениот пат за таа држава. Би било ужасно Албанија да го продолжи пристапниот процес во ЕУ, а Македонија да остане, смета Петков.
Иако Бугарија веројатно ќе оди на уште едни предвремени избори, а Генчовска е во оставка како и целата Влада, таа продолжува со активности. Сакаше да се сретне со колегата Бујар Османи во Банско во периодот од 9 до 11 јули. Таму се организира годишен состанок на Мешовитата меѓувладина комисија за да се разгледа „исполнувањето на Договорот за добрососедство во изминатиов период и да се преземат мерки за подобрување на двостраната соработка во сите сектори“.
Но, Османи не отиде. Министерството ја известило Софија дека Османи во овој период ќе се фокусира на процесот во Собранието, а експертите од двете министерства ќе продолжат со работа. Османи остава можност за онлајн средба со Генчовска, доколку има потреба.
А Собраниската дебата сѐ уште не е закажана. Терминот ќе биде утврден на утрешната координативна средба на партиите и пратениците кај спикерот Талат Џафери, како што завчера најави неговиот кабинет. Можно е тоа да се случи во текот на оваа недела откако ќе почне и ќе се прекине расправата за ребалансот на буџетот, или пак ќе се чека гласањето по петдневната дебата.
Опозициската ВМРО-ДПМНЕ го повика Џафери да ја врати Информацијата од половина страница и да бара дополнение со сите документи и со протоколот, тој упатува на веќе објавените три документи, а СДСМ е уверена дека францускиот предлог ги гарантира македонскиот јазик и идентитет.
Соња Николовска