Подмладената македонска женска ракометна репрезентација во првото коло на турнирот на Медитеранските игри во Оран е совладана од Турција со 34:27.
Нашата селекција беше рамноправен противник во поголемиот дел од првото полувреме. До 19-тата минута се играше гол за гол, а во овој период на моменти имавме и предност од еден погодок.
Во завршните десетина минути од првиот дел Турција направи серија од 3:0 која бргу успеавме да ја анулираме и повторно да го израмниме резултатот, но во финишот Турчинките повторно направија предност од три погодоци и на одмор заминаа со водство од 19:16.
На почетокот од вториот дел Турција стигна и до предност од шест гола која ја одржуваше до 50-тата минута кога стигнаа и до водство од 30:21, а до крајот на натпреварот нашите ракометарки само успее да ја намалат предност на противничките за конечни 34:27.
Најефикасна во репрезентацијата на Македонија со шест гола беше Јована Кипријановска, пет пати прецизна беше Ивана Џатевска, а по четири погодоци постигнаа Борјана Коцева и Теодора Дуковска.
Во второто коло утре нашите ракометарки се среќаваат со селекцијата на Србија.
ФОТО: Игор Паневски