Вардар славеше со 2-0 против повратникот во елитата Брегалница во првото коло од новата сезона во Првата македонска фудбалска лига. Шампионот денеска на арената „Тодор Проески“ настапи во комбиниран состав, но немаше проблеми да ги освои првите три бода.
Димитар Данев им донесе водство на „црвено-црните“ во 27. минута, додека Горан Закариќ ги постави конечните 2-0 во 81. минута.
Тренерот Кристијан Фабијани одмори дел од стандардните првотимци за реваншот против Рига на гостувањето во Летонија, во рамките на второто квалификациско коло во Конференциската лига на УЕФА. Во првиот натпревар, одигран во средата, Вардар загуби со 2-3 пред своите гледачи.
Струга денеска беше убедлива против дебитантот Шкендија Арачиново и славеше со 3-0. Вчера Тиквеш со 5-1 го декласира Арсими, а првото коло ќе се комплетира утре со уште два натпревари.
Во Кратово, Силекс го пречекува Башкими со почеток во 17 часот, а два часа подоцна ќе почне дуелот меѓу Шкендија и Скопје, кој ќе се одигра во комплексот на Фудбалската федерација на Македонија.