Европскиот парламент го усвои извештајот за Македонија на известувачот, европратеникот Томас Вајц, во кој влезе барањето за работата на историската комисија меѓу Бугарија и Македонија. Вајц со дополнителен амандма 3 побара да се отфрли овој дел од текстот, но не го помина гласањето од европратениците.
Работата на историската комисија беше дел од компромисниот амандман 31а усвоен од страна на Комитетот за надворешни работи на европскиот парламент пред две недели.
ТЕЛОП; Компромисен амандман 31а
„…Ги повикува сите страни да ја продолжат работата на Заедничката мултидисциплинарна експертска комисија за историски и образовни прашања на Бугарија и Северна Македонија и да ја извршуваат својата работа со добра намера, со што ќе ги зближат општествата“, стои во амандманот.
Во финалната верзија на документот влезе и барањето за уставни измени со охрабрување Македонија да ги вклучи сите свои етнички заедници во уставот, да поттикне инклузивност, да ја заштити различноста, да се бори против дискриминацијата и да ја зајакне социјалната кохезија во согласност со европските вредности и демократските принципи и целосно да гарантира еднакви права и можности за сите.
Извештајот за Македонија кој беше изгласан во 411 гласа „за“, со 120 гласа „против “ и исто толку „воздражани“, ја нагласува и важноста од спроведување на меѓународните договори со добра волја, како што договорите со Грција и со Бугарија.
Со Извештајот се реферира на реформскиот процес, но и на борбата против корупцијата, при што со загриженост се забележува дека не е постигнат напредок во спречувањето и борбата против корупцијата и дека корупцијата останува распространета во многу области. Особено повикува на истраги и конечни пресуди во случаи на корупција на високо ниво.
Документот бара и дополнително јакнење на парламентарниот надзор врз извршната власт, забележува дека сеопфатната изборна реформа е сè уште задоцнета; повикува на поголема транспарентност во однос на финансирањето на политичките партии и политичкото рекламирање, а се изразува загриженост за кампањите за дезинформации кои ги доведуваат во прашање демократските вредности и целта на земјата за членство во ЕУ.
Тамара Грнчаровска