МЗТ Скопје го дели само една победа до нова шампионска титула во домашното кошаркарско првенство, откако максимално го искористи домашниот паркет и поведе против Маџари со 2-0 во финалната серија.
МЗТ Скопје доминираше три четвртини, но Маџари одигра феноменални последни 10 минути и го направи финишот многу интересен. По првото полувреме, актуелниот шампион водеше со 47-31, а претходно имаше и највисоки 18 поени разлика.
Во третиот период МЗТ ја задржа двоцифрената предност, но Маџари покажа дека не е случајно во финалето. Во четвртата четвртина гостите сериозно се заканија и се доближија на негатива од само три поени. Сепак, актуелниот шампион не дозволи голем пресврт и стигна до победа од 81-76.
Смит беше најефикасен во редовите на МЗТ со 19 поени, додека Војдан Стојановски имаше 18. Луис го предводеше Маџари со 25 поени, а Армстронг додаде 17.
Третиот натпревар од финалето се игра на теренот на Маџари в недела. МЗТ со победа ќе ја освои 13-тата шампионска титула.