ТФТ Скопје вечерва ја продолжува битката за пласман во АБА-лигата. На домашен терен во салата „Лазар Лечиќ“ во Скопје, македонскиот тим го пречекува Борац Чачак и мора да победи за да избори мајсторка.
ТФТ доживеа убедлив пораз на првиот натпревар во Чачак со 97-61, што беше четврти пораз во низа во сите натпреварувања. Очигледно е дека заморот ги стигна избраниците на тренерот Боро Смилковски, кои покрај од Борац, загубија и од Маџари на домашен терен во првиот полуфинален натпревар од плеј-офот во домашното првенство. На тоа се надоврза и поразот од Широки во последните секунди од финалето во АБА2-лигата.
Смилковски изјави дека тимот изминативе денови ги минал во рекуперација и подготовка, а следните два натпревари ќе ја одредат целата сезона за ТФТ. Борац е исклучително квалитетен состав, кој сезонава заврши на претпоследното место во АБА-лигата, но во своите редови има искусни и квалитетни поединци, како и подолга клупа од македонскиот претставник.
ТФТ без дилема е едно од најпријатните изненадувања во регионалната кошарка сезонава. Тимот најпрво стигна до финалето во АБА2-лигата, а сега преку баражот со Борац се обидува да испише нова историја и да обезбеди место во елитното регионално друштво.
Натпреварот меѓу ТФТ и Борац се игра вечерва со почеток од 20 часот.
*ФОТО: Борац Моцарт/Душко Радишиќ