Онколошките пациенти во Русија во наредните месеци ќе почнат да примаат вакцини, најави Александар Гинцбург, шеф на истражувачкиот Институт за епидемиологија и микробиологија „Гамалеја“, пренесува агенцијата ТАСС.
Новата вакцина е осмислена како персонализиран третман и ќе гаѓа малигни тумори со користење на сопствени генетски информации од пациентот.
Развиена е со помош на вештачка интелигенција, технологијата на информациона РНК (mРНК) ѝ овозможува на вакцината да се адаптира на специфичен профилна рак на секој поединец, нудејќи потенцијално ефикасна и таргетирана терапија.
„Сите документи се доставени до министерството за здравство и се надеваме дека Институтот Херцен, Центарот Блохин и нашиот Институт наскоро ќе добијат одобрение за почеток на производство на првите типови на персонализирани вакцини против меланом“, рече Гинцбург.
Тој додаде дека групи со пациенти се веќе формирани, нивните генетски информации се анализирани и оти истражувачите се подготвени да започнат со лекувањето „во рок од месец или месец и половина“.
Претходно овој месец, Вероника Скворцова, шефица на Федералната медицинско-биолошка агенција, изјави дека новата ваквина против рак покажала висока ефикасност за време на претклиничките испитувања и дека е подготвена за клиничка примена.