Чаби Алонсо ќе биде новиот тренер на Реал Мадрид и ќе го замени Карло Анчелоти, кој наскоро и официјално ќе се збогува од кралскиот клуб и тоа најверојатно без трофеј во оваа 2025 годинa.
Алонсо имаше три одлични сезони на клупата на Баер Леверкузен, каде официјално најави заминување една година пред истекот на неговиот договор. Германците имале џентлменски договор со тренерот да си замине кога ќе посака, без клубот да му прави никакви проблеми.
Шпанецот на клупата на Леверкузен седна во октомври 2022 година и од претпоследното место на табелата во Бундеслигата го одведе до шестото, а веќе во следната сезона дојде и до шампионската титула во Германија.
Алонсо ќе потпише договор со „кралевите“ до јуни 2028 година. Тој добро го познава клубот, бидејќи е поранешен играч на Реал Мадрид, чиј дрес го носеше од 2009 до 2014 година. Важи за еден од најдобрите млади тренери, кој преферира офанзивен фудбал, токму каков што им е потребен на „лос бланкос“.
Според шпекулациите, Алонсо во Мадрид ќе се пресели заедно со својот стручен штаб од Леверкузен и се очекува да почне со работа уште на 1.јуни. Клубот сака да го искористи Светското клупско првенство летово за тој веднаш да ја наметне својата филозофија и формација во играта на тимот.