Голем број студенти го блокираа влезот на зградата на државната телевизија на Србија во Белград обвинувајќи ја јавната ТВ станица за фаворизирање на владата на претседателот Александар Вучиќ. Слична блокада беше организирана во вториот по големина град во земјата Нови Сад.
Студентите во Србија стојат зад речиси секојдневните собири што започнаа откако бетонска покривна конструкција се урна во ноември на железничка станица во Нови Сад, при што загинаа 16 лица.
Протестите го потресоа владеење на Вучиќ и неговата цврста контрола на власта. Многумина во Србија веруваат дека огромната бетонска конструкција паднала поради лошата изведба на реновирањето поради корупција.
Студентите инсистираа на целосна одговорност за трагедијата, повик што доби широка поддршка кај граѓаните кои се главно разочарани од политичарите и ја изгубија довербата во државните институции. Вучиќ ги опиша митинзите како трик оркестриран од Западот за да го собори од власт.