Арина Сабаленка ќе се соочи со тинејџерката Мира Андреева во финалето на Индијан Велс во женска конкуренција. Вечерва на програмата се машките дуели од полуфиналето.
Андреева која има само 17 години се пласираше во своето второ мастерс финале по ред откако исто така втор турнир по ред ја победува Ига Швјонтек. Русинката беше подобра во три сета со 7-6, 1-6 и 6-3 што за неа е 11-та победа по ред и воедно стана најмладата финалистка на Индијан Велс уште од Ким Клајстерс во 2001 година.
Нејзина ривалка во големото финале ќе биде првата светска тенисерка Арина Сабаленка. Белорусинката ѝ се реваншираше на Медисон Кијс за поразот во финалето на Австралија опен и тоа со убедливи 6-0 и 6-1.
Вечерва на програмата се машките полуфинални пресметки. Холгер Руне игра против Данил Медведев, додека Карлос Алкараз ќе се соочи со Џејк Дрејпер.