Со оглед дека се познати сите учесници на Европското првенство, дел од репрезентациите кои не стигнаа до турнирот летово ќе играат претквалификации за пласман на Светското првенство во 2027 година што ќе се одржи во Катар. Со тоа и Македонија ги дозна потенцијалните ривали на патот до турнирот.
Во претквалификациите за Мундобаскетот ќе има исклучително силни репрезентации, кои исто и како Македонија не успеаја да се пласираат на Европското првенство. Во втората фаза од претквалификациите ќе играат и селекциите на Хрватска, Бугарија, Украина, Унгарија и Холандија, како и Данска и Словачка. Од првата фаза во претквалификациите се пласираа и Австрија, Норвешка, Романија и Швајцарија.
Со ждрепка репрезентациите ќе бидат поделени во четири групи со по три репрезентации, а само првите две ќе обезбедат пласман во главните квалификации за Светското првенство. Натпреварите ќе се играат летово од 2 до 12-ти август.