Македонската ракометна репрезентација трет ден работи напорно во Стара Пазова во рамки на подготовките за Светското првенство во јануари. Нашиот тим првата фаза ќе ја комплетира во Србија до 30 декември по што ракометарите ќе имаа краток и заслужен одмор за Нова година.
Селекторот Кирил Лазаров во Скопје во неделата само направи прозивка на повиканите 20 ракометари кои ќе бидат во комбинација за Мундијалот во Хрватска, Данска и Норвешка, па експедицијата веднаш замина за Стара Пазова.
Меѓу повиканите ракометари е и младиот голман Иван Галевски. Чуварот на мрежата на Алкалоид за прв пат доби сениорски повик во евроквалификациите за дуелите со Естонија и Литванија, а сега ќе конкурира и за настап на Светското првенство.
„Чест и задоволство ми е што сум дел од овој колектив. Нѐ очекува еден голем предизвик, но тоа не треба да ни претставува притисок, напротив еден мотив плус за секој го даде својот максимум. Подготовките се одвиваат добро и се надевам дека подготвени ќе го дочекаме стартот на Светското првенство”, изјави Галевски.
Македонија своите натпревари од групата Д, што се игра во Вараждин, Хрватска, ги стартува на 15.јануари против Унгарија. Два дена подоцна играме со Холандија, а во последното коло на 19-ти, ќе се соочиме и со Гвинеја. Првите три репрезентации од групата се пласираат во главната фаза, последнопласираниот тим ќе продолжи да игра Президент куп.